கடைவீதி போகும் வழியில்

கடைவீதி போகும் வழியில்
 

காலை முழித்து கடைவீதிக்கு நடந்தேன்
மூலை முடுக்கும் பார்த்துக்கொண்டே கண்கள்
ஊரையே பனிப்புகை போர்த்தி மூடிவிட
உடலைப்போர்த்த ஏதுமின்றி நடுக்கத்தில் முதியவர்

தள்ளாடி தத்தித்தத்தி வந்துநின்ற முதியவர்
இன்னும் சோறாக்கலய்யா என்ற அந்தம்மா
விறுவிறுவென்று மொட்டைமாடி சென்று சோறுவைத்து
காகாவென்று காக்காயை விருந்துக்கு அழைக்கிறார்

மண்டையோடு வடிவங்காட்டும் ஒட்டிய தோல்கள்
மூங்கில்கணு இடுப்பில் கண்ணீருடன் பாப்பா
பால்வாங்க பத்துகேட்டவளை விரட்டிய கடைக்காரர்
செல்லநாய்க்கு கிண்ணத்தில் பாலூற்றி கொஞ்சுகிறார்

இலட்சப்பண மகிழுந்துவிட்டு இறங்கிய செல்வர்
கையகல கைபேசியில் கதைத்தபடி சந்தைநுழைய
இணைய வர்த்தகத்தில் உடைவாங்கல் பற்றிபேச்சு
காய்கறிக்கடை மூதாட்டியிடம் தக்காளிக்கு பேரம்பேசுகிறார்

சங்கிலியில் பிணைத்த நாயுடன் நடைபயிற்சி
தெருவோரம் படுத்திருந்த நாயொன்று அருகில்வர
தெருநாயென்று கால்லால் அடித்து விரட்டுகிறார்
நாயிலும் வீட்டுநாய்தெருநாய் இனம்பிரித்த மனிதர்

அவசரஊர்தி ஓட்டுநரிடம் பையை திறந்துகாட்டி
கலங்கியபடி கர்ப்பிணி கடுகடுவென ஓட்டுநர்
திரும்பிவந்த கர்ப்பிணி ஆட்டோவில் ஏறிச்சென்றார்
ஆட்டோவின் பின்னால் பிரசவத்திற்கு இலவசம்

- சரவணபெருமாள்