நாளிதழே

நாளிதழே

நாளிதழே நாற்புறமும் பரவியதே
காலைத்தேநீர் கசந்துவிடும் நீயின்றியே
பகுதிநேர வேலையளித்தாய் சிறுவனுக்கு
பரவாயில்லை கட்டிடுவான் தேர்வுக்கட்டணம்

நாச்சுவர்நடப்பு நாற்றிசை பறைவாய்
நாற்றிசைகாட்டி நாச்சுவற்றுள் நுழைவாய்
நானும் பக்கமெல்லாம் புரட்டுகிறேன்
நாளிதழே நற்செய்தி கிடைக்கவில்லையோ

நடிகையின் பிரசவம் வண்ணப்படம்
காணவில்லை அறிவிப்பு கருப்புவெள்ளை
திரைப்படச்சேதி இலவச பிரசுரம்
குழந்தைத்தேடல் காசுக்கு விளம்பரம்

பிரபலத்தின் பேச்சு தலைப்புச்செய்தி
முதுகெலும்பின் போராட்டம் மூலைச்செய்தி
மாணவன் கண்டுபிடிப்பு குறுஞ்செய்தி
மக்கள் பிரச்சனைபல வாராச்செய்தி

மதுவிலக்கு மாணவிப்போர் மூலைப்பக்கம்
ஆடைச்சுதந்திர அமைப்புப்போர் முதற்பக்கம்
திரைப்பட விளம்பரம் தனிப்பக்கம்
இளைஞர் சாதனை ஏதோ ஒருபக்கம்

தற்பெருமை ஆளுங்கட்சி நாளிதழ்
முன்னாட்சி ஊழலை ஊழலாய் உரைக்கும்குரல்
தன்திட்டமெனும் எதிர்கட்சி நாளிதழ்
அளவைத்தாண்டி புழுகிடும் அதன்குரல்

அரசியல் செய்திகளானது போனது
செய்திகளில் அரசியல் ஆனது
டெங்குக்காய்ச்சல் மரணமும் மாறிப்போனது
மர்மக்காய்ச்சல் பலியென்று மாற்றமானது

தவறாய் அச்சிட்டு தமிழைக்கொல்லாதே
மனைஇலவசம் மனைவிஇலவசம் ஆக்காதே
ஓரெழுத்தும் ஒருபொருள்தரும் தமிழல்லவோ
ஓரெழுத்துமாற பொருளனைத்தும் மாறுமல்லவோ

நாளிதழே நயஞ்சுட்டல் வல்லதே
கணவனுக்கு ஆப்பு காட்டிக்கொடுத்த சூப்பு
இளைஞர் கொலை நண்பருக்கு வலை
அடடா அடடா என்னமாய் சுட்டுகிறாய்

நன்றாய்க்கேள் நாளிதழேநீ மாறுவாய்
நல்லநல்ல சேதியோடுநீ வருவாய்
தனித்தமிழில் பிழையின்றிநீ வருவாய்
வருங்கால சந்ததிநீ பேணுவாய்

சமுதாய கூட்டங்கள் சேதிவேண்டாமே
சமூகஒற்றுமை கட்டுரை போடு
சாதிச்சாய மாலைஅணிவிப்பு சேதிவேண்டாமே
சாதிஒழித்தலைவர் உரையை தொடராய் போடு

- சரவணபெருமாள்