பேருந்தில் ஒருநாள்

பேருந்தில் ஒருநாள்

கைநீட்ட நின்ற நகரப்பேருந்து
          நடுவழியில் நகர மறுத்தது
நகராப்பேருந்து நாலைவர் நகர்த்த
          சமாதானம் நகர ஆரம்பித்தது
ஏதோ உடைந்து விழுந்ததுபோல்
          அடிக்கடி தடதடதட சத்தம்
நிறுத்தும் இடம் எல்லாம்
          கீஇச்சென்ற சத்தம் ஒலிமாசு

இடம்தேடி கண்கள் சுழல
          கடைசி முன்னிருக்கை காணவில்லை
வேறொரு இடம் கிடைத்து
          அமரஅது ஆட்டம்போட ஆரம்பித்தது
இருக்கைகளின் பின்புறம் எல்லாம்
          சாதிய வசனம் ஒருவரிக்கவி
நடிகர் பட்டங்கள் திட்டல்களென
          விளம்பர மேடைகள் இருக்கைகள்

மிதமான தூரல் தூவ
          சன்னல் கண்ணாடி இறக்கினேன்
வலுகொண்டு அமுக்கிப் பார்த்தேன்
          பல்கடித்து இழுத்துப் பார்த்தேன்
இறுதியில் கண்ணாடியே வென்றது
          சட்டை குளித்து முடித்தது
மழையது நின்று போக
          மறுபடியும் பேருந்து நோய்வாய்ப்பட்டது

பத்துப்பேர் இருந்தோம் பயணிகள்
          அருகில் இடமெனசிலர் நடந்தனர்
சற்றேபோக ஒருபேருந்து நிறுத்தம்
          எப்போது விழுமோ நிழற்குடை
நிறுத்தப்பெயர் குடையில் தேட
          அரசியல் திருவிழா சுவரொட்டிகள்
வாளேந்திய மன்னர்கள் நடிகர்கள்
          முகம்பொறித்த இல்லவிழா வரவேற்புகள்

அடுத்துவந்த பேருந்தில் ஏறினேன்
          கடைசிவரை தெரியவில்லை நிறுத்தப்பெயர்

- சரவணபெருமாள்