எழுதி முடியாத அழகு அவள்

எழுதி முடியாத அழகு அவள்

அடடா அவள் அழகி
ஆளை மயக்கும் குழலி
எத்தனை கவி எழுதியும்
எழுதி முடியாத அழகு அவள்

அருவி வீழ்ச்சி சரிந்த கூந்தல்
அதில் குளிக்கும் ஆசையில் என்முகம்
கட்டிவைத்த குப்பி அவிழ்க்க
மூழ்கிப்போனது முடியுள் என்முகம்

நெற்றி நெடுநாள் பிரார்த்தனை
உதடுகள் உட்கார விரும்பும் பூங்காவனம்
நெற்றி வேர்வை சுனைநீர்
உதடுகள் குளித்தெழ ஊற்றெடுக்கும்

நெற்றி மேல் விழுந்த பொட்டு
மூக்கின் மேல் சிதறுவது உலகவழக்கம்
ஒருதுகளும் உதிரவில்லை ஆச்சர்யம்
காரணம் பொட்டின் சிறப்பல்ல நெற்றியின் வனப்பு

ஊசியிலைக்காடு புருவம் ரெண்டும்
சட்டென பார்த்து திரும்பினாலும்
துளைபோடுகிறது மனதில்
நிலைததும்புது நிஜவாழ்க்கை கனவாகிறது

வழுக்கும் இடத்தில் அமர்ந்த வண்ணத்துப்பூச்சி
உட்கார்ந்த இடத்திலேயே எழும்பாமல்
படபடவென சிறகடித்து தோற்றும் அழகுபோல
வலிக்காமல் கண்களை அடிக்கும் இமைகள்

கண்ணது கதிரியக்கச்சாதனமோ
எதேச்சையாய் அவள் பார்த்தால்கூட
நேராய் ஊடுருவி நெஞ்சைப்பிளக்கிறது
மின்னியக்கம் போல துள்ளவிடுகிறது

கருவானில் ஒரு வெண்ணிலா உள்ளது
வெண்வானில் ஒரு கருநிலா அவள் கருவிழி
வானிலவை மூட வெண்மேகம் போர்வை
விழிநிலவை போர்த்தும் மேகம் கண்ணிமை

மூக்கு முந்திவந்து முகமுரசும்
எந்தநேரமும் முழித்திருக்கும் பாகமது
உதடுகளின் முத்த உரசலில்
முற்றிலும் இலவசம் மூக்கின் உரசல்

காதுமடல் கவிமடலின் ஆரம்பம்
காதலின் உச்சத்தில் உதடுகளின் தஞ்சம்
தொங்கிக்கொண்டிருக்கும் கம்மல்கள்
தூக்கணாங்குருவி கூடுகள் முத்துக்கள் குருவிகள்

கன்னங்கள் நெருக்கங்கள் நீளும் இடங்கள்
காயமின்றி கடிபடும் அப்பாவிகள்
பற்கள் படாமல் தொடாமல்
உதடுகள் கடிக்கும் காயங்கள் மாயங்கள்

உதடுகள் இரட்டைக்கிளவி இலக்கணம்
பிரிந்திருந்தாலும் அர்த்தம்தரும் இலக்கணப்பிழை
உடல்முழுதும் முத்தங்கள் போட்டாலும்
இங்கொன்று இல்லையென்றால் முழுமைப்பாடாது முத்தம்

கழுத்து உதடுகள் வழுக்கி விளையாடுமிடம்
வேண்டுமென்றே வழுக்கி நழுவி விழுமிடம்
மூச்சுக்காற்றின் சூடுகள் சுடும் இடம்
சுட்டாலும் எட்டிப்போகாமல் உதடுகள் கூடுமிடம்

- சரவணபெருமாள்