கனவு மெய்ப்பட வேண்டும்

கனவு மெய்ப்பட வேண்டும்

இலட்சியமே என்கனவே முழித்திடு வாயே

      இராக்கனவே வீணேதாம் துரத்திடு நீயே

கட்டில்லை காவலிலை பயணப் பட்டே

      கனவேமெய்ப் படுவாயே வானந் தொட்டே

உலகைப்பெயர் உள்ளங்கை நடுவே நட்டு

      உலகைச்சுழல் உன்னிப்பாய் உளதைக் காட்டு

தாய்மொழியெதோ தழுவினரோ தேச மெங்கும்

      தமிழ்மொழியதோ பாரேறி ஊதுஞ் சங்கும்

தமிழறிந்தான் தமிழ்மட்டு மறிந்தான் யாரும்

      தரணிமுழுஞ் சுற்றுங்கனா மெய்யாய் வாரும்

மூன்றாமக வையாங்கில மோகம் வீழ்க

      முத்தமிழே மழலைச்சொல் முத்துக் குளிக

நாடுபல உண்டிங்கே நூற்பல உண்டே

      தமிழற்ற நூலகமிலை மெய்க்கனா கண்டே

எம்மையா ளுந்தமிழே நும்மை யாளும்

      எம்கனவே மெய்யோடி உலகை ஆளும்

ஏழைக்கொரு எடுத்துக்காட் டின்றி போக

      எந்நாட்டில் எல்லோரும் மன்ன ராக

எத்தனையோ கோடிகளே கொண்டான் கூட

      ஏர்பிடித்துழ துயிலெழுந்தே வயலுக் கோட

சேறுமுழுகிச் சேர்ந்தானைக் கண்ட கையும்

      மறுநொடியே கூப்புவதே அனிச்சை யாயும்

ஆட்காட்டி விரலாடி சுட்டுந் திசை

      ஆளுஞ்சேவகன் ஓடுங்கனா மெய்யாய் இசை

மூடிக்கிடக் கட்டுமிங்கே முதியோ ரில்லம்

      நாடியடங் கட்டுமந்த அனாதைச் சொல்லும்

ஆதரவே அற்றுப்போ அனாதை இல்லம்

      ஆருமில்லை உன்வீட்டில் எங்கனா வெல்லும்

தாய்ப்பறவை குஞ்சைத்தெரு விட்ட சேதி

      தாய்ப்பசுவை கன்றுமுட்டி விரட்டுஞ் சேதி

களவாங்கி காசுக்காய் குளவி விற்றும்

      கறிவளர்ப்பார் கதையில்லை கனவு முற்றும்

காந்திகனா கண்டேனே கனவாய் நானும்

      கழுத்துநகை போட்டபெண்ணே நடவாய் நீயும்

துணையின்றி பயமின்றி வீரநடை போடு

      அணைந்தவொளி இருட்டிலும் தனிநடை போடு

யாரதுவழி மறிப்பாருனை முறுக்கு கைகள்

      வாரதென்ன முறுக்குமீசை உன்னால் உடையும்

காமத்தோடு நீளுங்கை வெட்டு பெண்ணே

      கண்டகனா மெய்யாக்கி நிமிர்த்து பெண்ணே

எல்லையெதும் இல்லையடி பெண்ணே கல்நீ

      எவனேதும் வகுத்தாலதை யழித்தே வெல்நீ

விண்ணேறிய பெண்மைத்திறங் கொண்ட நீயோ

      மண்ணாண்ட வீரமேநீ வளைந்திடு வாயோ

அடுப்பூதும் பெண்ணெண்றே இழிக்கும் மூடா

      அவள்கல்வி அறியாமை அழிக்கா வீடா

மெழுகானது போதுமடி பெண்ணே போதும்

      எரியாதே புல்லரையே எரித்தே மீளும்

கற்றோரே சான்றோரே தேர்தல் காணும்

      கனவேகனி அரசியலே சுத்தம் பேணும்

வாக்குக்கே வாங்கோமே யாரும் ஏதும்

      வாக்காரே யோசிக்க நன்றுந் தீதும்

நல்லோரை நாற்காலி ஏற்றி வைப்போம்

      அல்லோரை மீவழைக்கும் விதிகள் கேட்போம்

வென்றோனே தலைவனன்றே வேலைக் காரன்

      என்கனவே மெய்ப்படுநீ தண்டல் காரன்

ஓட்டைகளே இல்லாப்பே ருந்து வேண்டும்

      ஓட்டுக்களே ஒழுங்காயிட சாத்திய மாகும்

சட்டங்குடை பெருச்சாளி சாக வேண்டும்

      நாயொன்றைக் கொன்றாலும் நீதி வேண்டும்

தாமதாமாய் வரும்நீதி அநீதி ஆகும்

      தர்மங்கேட் டான்சாக எதற்கு ஆகும்

வேலியதே பயிர்மேயும் மொழிமெய் வேண்டாம்

      காவலரே நலிந்தாரைத் தாக்க வேண்டாம்

பாறைமேல் போட்டவிதை முளைக்க வேண்டும்

      கொடுத்துக்கெடா கொடாமற்கெடா வருணன் வேண்டும்

விதைத்தவனே விளைந்தனவிலை விதிக்க வேண்டும்

      விவசாயுமே முதலாளி யாக வேண்டும்

மதியாது மச்சுக்குள் இருந்தான் சோறு

      கதியேதும் இல்லாமலே வயிற்றுக் கூறு

வரும்காலம் வருங்காலம் வந்தாற் சிற்றே

      வந்ததுமே தண்டனையே பசிதீர்த் துற்றே

பிணிசெய்து குணமாக்கோன் மனித னல்ல

      பணம்பார்க்க மருத்துவமே தொழிலே அல்ல

இரத்தஞ்சொட் டியொருத்தன் வரவே ஆங்கே

      படிவங்கே ளாமருத்துவ சாலை யெங்கே

மருத்துவக்கனா கண்டசிறுமி மாண்டா ளிங்கே

      இலட்சியக்கனா சிதையாத கல்வி யெங்கே

வரிகேட்டு நரியமர்ந்த ஆட்சி வீழும்

      மதுவூட்டி உயிரழிக்கும் மந்தை மாளும்

ஊழலாளி கொலையாளி வெளியே சுற்ற

      அழகுக்கிளி அதேகுற்றம் சிறையே உற்ற

சாதனையோ தேசப்பெயர் சுமந்தே போக

      சாவுகளோ ஏனோவோ தமிழ னாக

தாம்பிடித்த முயலுக்கு மூன்றே காலே

      வம்பாக வதைத்திட்டம் பலவே வேலே

குத்துதேயது குடையுதேயது கனவே நீயே

      சித்தம்போ லழித்தேநீ மெய்ப்பிப் பாயே

குடிசையில் லாநாட்டில் நானே வாழ

      துடிப்போடு கனவேநீ செயலை யாற்று

குளமேரி கண்மாய்க்கால் வாயும் மீள

      நடிப்போடு போலிதந்த தகவல் சாற்று

புதையுண்ட நீர்நிலையே உயிர்த்தெ ழேநீ

      வதையுண்ட விளைநிலமே வந்தெ ழேநீ

நன்னீரைக் கடல்சேர்க்கும் ஆறே கைது

      நடுவேயணை போடேயொரு சிறையே செய்து

யாசகமே கேளாத மாந்தர் வேண்டும்

      யாவருமே கேளீரே உணரர் வேண்டும்

கொலைக்கொள்ளை சேதியற்ற நாளிதழ் வேண்டும்

      பத்திரிக்கை பசிதேடா நிலையே வேண்டும்

சாதியொழித் தலைவர்மேல் சாதி வேண்டாம்

      சதியேசிலை செய்துசாதிச் சாயம் வேண்டாம்

வீதிக்கொரு சாதிக்கட் சிவேண்டவே வேண்டாம்

      நாதியற்றே செத்துப்போ வாநிலை வேண்டாம்

அவசரஊர் தியின்றித்தோள் சுமந்தான் பிணமே

      அவமானமே இன்றியுள்ளார் பணமே பணமே

குழந்தைபல கொத்தாகச் சாகத் தினவாய்

      சொன்னானே காற்றுக்கிலை பணமே பணமே

சோதனைபல விட்டானே அவனே தினமே

      அவன்கட்சி தப்புவதே பணமே பணமே

இதற்கெல்லாங் காரணமே ஓட்டுப் பணமே

      இதுவில்லாக் கனவேமெய்ப் படுவே விரைவே

வைகைகாக் கமலக்கிய மெத்து வைத்தார்

      கடற்சேர்ந்த எண்ணெய்எட வாளி கொண்டார்

டெங்குவையே தடுத்திடவே சாணி யென்றார்

      உறுப்பினரை ஓடாவிடாப் பேணிக் கொண்டார்

அணிமாறி அணிமாறி போயே வந்தார்

      அரையோடு டெல்லிபோன விதையார் விட்டார்

அறைகூவல் விடுத்தோய தெரியா தென்றார்

      அவர்காதே செவிடாகுங் கனவே மெய்யேற்

குடித்திடவே விளைத்திடவே தண்ணீ ரில்லை

      குளிர்பானத் தொழிற்செய்யத் தடையே யில்லை

தொழிற்பெருக்கி நிதிபெருக்கத் துப்பே யில்லை

      யாமுழைக்க வரிபிடிக்க கூச்ச மில்லை

தொலைக்காட்சி அலைபேசி திட்ட முண்டு

      யாம்படிக்கும் மேற்படிப்பில் துட்டு முண்டு

இப்படியே ஆண்டாரை இனமே கண்டு

      இனிமேலே வாராக்கன வேமெய்ப் பூண்டு

கனவேநீ மெய்ப்படூஉ வாயே வந்து

      நனவைத்திரி உலகமழியு முன்னே முந்து

மதமேயது இல்லாத உலகே வேண்டும்

      மனிதச்சா தியொன்றேதான் வாழ வேண்டும்

நாம்பெரிதோ நீப்பெரிதோ சண்டை கொல்லே

      நாடேதும் ஊற்களையு மன்பே வெல்லே

வெள்ளைப்புறா வினமேநீ உலகைச் சுற்று

      ஆயுதமழிக் குமாயுதமா யுன்னை மாற்று

வெள்ளங்கள் வரும்முன்னே சைகை போடு

      கடலூரே நுழையத்தடை வலிதாய் போடு

வெந்தழலில் வேகாத சக்தி ஈயேன்

      வெய்யோனைக் கட்டுவிக்கும் வித்தை தாயேன்

வாவெனவர நில்லெனநில மாரி தாயேன்

      கண்ணில்நீர் மூலமேநீ ஓடிப் போயேன்

பூப்போல மலர்ந்தன முகமே மாந்தர்

      பூலோகம் முழுதுமே புன்னகை வேந்தர்

அழிக்குமறி வியலேநீ முழுதாய் வீழ்க

      ஆக்குமறி வியலாய்நீ சிறப்பாய் வாழ்க

வெண்ணிலவே பார்த்துச்சோ றுண்டோம் போதும்

      வெண்ணிலவில் சிற்றுண்டி காலம் வாரும்

நட்சத்திர அப்பளங்கள் தின்றோம் போதும்

      நாட்டுவோமே நட்சத்திர வீடு நாமும்

விளையாட்டுப் பிள்ளைகா ணோமென் றேநாம்

      விண்வெளியிற் தேடும்விந் தையும் வாரும்

இன்பச்சுற் றுலாபூமியில் சலித்தோ மென்று

      விண்ணுக்கொரு ஏற்பாடு வானவில் செல்வோம்

வந்ததுதான் வந்தோமே செவ்வாய் சென்று

      என்னதுதான் இருக்கிறது அதையும் பார்ப்போம்

போனவழி வந்தவழி வசிப்போர் பார்த்தால்

      நம்கிரகம் அழைத்தவரை உபச ரிப்போம்

செந்தமிழைச் செப்புவித்து கிரகந் தாண்டி

      அங்கேயொரு தமிழ்ச்சங்கம் திறந்தே வைப்போம்

இப்படியாக

கனவே பல்லாயிரம் உண்டு

இவற்றிற்கே

அதில் முதலிடம் உண்டு

நான் விரும்பும் நேரமே வரும்

      நிறுத்தும் நேரமே நிலும்

என்கண் கேட்டது மட்டுமே காட்டும்

      திருப்பும் திசையெல்லாம் திரியும்

என் கனவே

மனதில் ஓடியது போதும்

வெளியே தாவு

விரைந்தே மெய்ப்படு

விடியட்டும்

நல்லதொரு விடியல்

-    

        -  சரவணபெருமாள்