நிதமொரு ஏமாற்றம்

நிதமொரு ஏமாற்றம்

வானைப்பார்த்து படுத்திருக்கிறேன்!
நிலவை 
மேகம் மறைக்க முயல
என் இமைகள்
எல்லாவற்றையும் மறைக்கும்
முயற்சியில் உள்ளன!

மூடிய பின்பும்
கண்களுக்கு உயிர் கொடுக்க
கனவுகள் காத்திருக்கின்றன!

கனவை சாக்குச்சொல்லி
நெருங்கும் முயற்சியில்
நீ உள்ளாய்!

நிஜமென நம்பி நான் முழிக்க
நிதமொரு ஏமாற்றமே எனக்கு!

- சரவணபெருமாள்

தலையணை முத்தம்

தலையணை முத்தம்

உன்னில்
இதழ் பதிப்பதாய் நினைத்தேன்
முத்தங்களை
தலையணை வாங்கிக்கொண்டது

- சரவணபெருமாள்

முதிர்கன்னி

முதிர்கன்னி

பூத்த திரு தினத்தில்

பூஜை போகும் பூ

போகாமலே

பூச்செடியில் தங்கினேன்

வழக்கம் மாறி

வண்டுகள் வந்து மொய்க்க

வழக்கத்தோடு வரும் வண்டுக்காக

செடியுள் மறைந்தேன்

தேநிறைந்த மலரைக் காக்க

மதுவுண்ட தந்தையம்மா

தாயென்ற செடியிலும்

நோயொன்று தாக்க

நானென்றானதம்மா

என்னோடு இருமொட்டு

உரமின்றி போக

உணவுக்காக நானுழைக்க

பூஜைக்கு அழைத்தே

வழக்கத்தோடு வந்த நாரை

வரவேற்கவில்லை

என் பின்

அரும்பிய மொட்டுக்கள்

மலராயின

மாலைக்கு நாருறித்தேன்

மாலை தொடுத்த நேரம்

அபசகுணம் என்றே

ஒதுக்கப்பட்டேன்

கையாலாகா தந்தை

கைதாங்கலாய் தாய்

சூழல் கண்டு

சுற்றிச்சுற்றி மீசை வர

தாழிட்டேன் வீட்டை

தள்ளிவிட்டே வாழ்கிறேன்

ஊடல் காற்றும்

உடலைத்தொட்டுச் சோதிக்க

உணர்வை அடக்கி

உள்ளத்தில் தாழ் போட்டேன்

இனி அவ்வளவுதான்

எண்பதிலும் கன்னியென்றெ

வெட்கம் கொள்வேன்

முதிர்கன்னியென்றே

முதிர்பூவாய் உதிர்வேன்

என் மகரந்தம்

மாலையின்றி

மலடானதே என் துயரம்

-    சரவணபெருமாள்

சுமையானாயே! (முதுமைக்காதல்)

சுமையானாயே! (முதுமைக்காதல்)

எதையும் இழக்கவில்லை
என்றுதான் நினைத்தேன்;
ஏமாந்தேனடி

உன் அருகாமையை இழந்தேன்;
என் ஆளுமையை இழந்தேன்  
உன் அரவணைப்பை இழந்தேன்;
என் ஆழ்மனம் இழந்தேன்  
உன் இம்சைகளை இழந்தேன்;
என் இன்பங்களை இழந்தேன்  
உன் முகக்காட்சி இழந்தேன்;
என் முகமலர்ச்சி இழந்தேன்
உன் கொஞ்சுதலை இழந்தேன்;
என் மிஞ்சுதலை இழந்தேன்  
உன் ஆறுதலை இழந்தேன்;
என் தேறுதலை இழந்தேன்

நான் உன்னை இழந்தேன்;
நான் என்னை இழந்தேன்

மலர்த்தொடுத்து மஞ்சம் வந்தவளே!
மலர்த்தூவி விடை கொடுத்தேனே!

கைவிரல் பிடித்தவளே!
கைவிட்டுப் போனாயே!
பாதியில் வந்தவளே!
மீதியும் வைத்தாயே!
என்னையும் அழைத்திடம்மா!

தூரம் சுகமென்றாயே!
பெண்ணே! சுமையானாயே!
அருகே அழைத்திடம்மா!

                                         - சரவணபெருமாள்

யார் பிச்சைக்காரன்

யார் பிச்சைக்காரன்

புண்ணியந்தேட பிச்சை போடும்
          எண்ணமோடும் எவரும் கேளும்
பிச்சைபோட நீட்டிய கையில்
          பிச்சை போட்டான் புண்ணியத்தை
பிச்சைக்கார னென்றே சொல்லி
          பிச்சை யெடுக்க வந்தாய்நீ
சோறுகொண்டான் பிச்சைய னென்றால்
          புண்ணியங் கொண்டான் பெயரென்ன
பசியென புசியென விட்டவனே
           புனித னென்றே யாமுரைப்போம்
புசியென விட்ட சோறள்ளி
          ருசியென நாய்க்கிட்ட னிறைவனே

                                        - சரவணபெருமாள்
         

உள்ளங்கால் முத்தம்

உள்ளங்கால் முத்தம்

முத்தங்கள் போட
உதடுகள் தேவையில்லை
உள்ளங்காலும் 
முத்தங்கள் போடுதடி
என் நெஞ்சில்

மகளே
நடந்தொரு முத்தம் போடு
பாவமடி பாதை
ஏங்கிப்போகிறது 


                   - சரவணபெருமாள்

தானாய்ச்சாவது மனிதம்

தானாய்ச்சாவது மனிதம்  

ஓரறி மரமது காய்ந்து
          ஒருநூ றுயிர்சுமக்குது ஊர்ந்து
ஈரறி நத்தையூ றின்றிபோக
          ஈரறிச் சங்குமுழங்குது இசையாக
மூவறி யெறும்புகரையான் கூட்டாக
          மூச்சோடிப் போகும்வரைசுறு சுறுப்பாக
நாலறி வண்டுபறக்குது இரைதேடி
          நாப்புறங் கூவியழைக்குது காக்காய்
ஐந்தறி கொண்டவுயிரது பாரடி
          ஐயோ டொருசேர்ந்தது கணக்காய்
ஆறறி மனிதமோசித்தது ஐயோடி
          மற்றறி வுயிரழித்தது தனக்காய்

கையிலவே கட்டுதுபுள் கூடு
          குச்சிகளை சுமக்கவல் லலகு
தூரம்போய் எடுக்கநல் சிறகு
          வேறிலவே ஆத்திரமுள் ளொருவீடு
கையுளதே துணைநரன் தேடுது
          காடழித்தே கட்டும்தன் ஊரது
காட்டுயி ரழித்தது நிலது
          தன்னின மழித்துமது வாழுது

றெக்கை முளைத்த புள்ளில்
          கிளியுண்டு கழுகுண்டு காக்காயுமுண்டு
மயிலுண்டு குயிலுண்டு குருவியுமுண்டு
          சிட்டுண்டு வாத்துண்டு புறாவுமுண்டு
காலில் நாலுள்ள வினத்தில்
          நரியுண்டு பரியுண்டு நாயுமுண்டு
புலியுண்டு எலியுண்டு பூனையுமுண்டு
          மாடுண்டு குரங்குண்டு கரடியுமுண்டு
இன்னு மின்னு மெத்தனையோ 
          இனத்தி லெத்தனையோ வுண்டு
அத்தனையு மினத்தி லெத்தனையோ
          பகை மூண்டு மியற்கையுமுண்டு
இரண்டே காலினத்தே மனிதமுண்டு
          இவ்வகையே இவ்வினமே ஒன்றேயுண்டு
புல்லழித்து புள்ளழித்து விலங்கழித்து
          தரையழித்து தன்னழித்து தானாய்ச்சாவது 

                                                  - சரவணபெருமாள்
          
          

வழுவா? வழுவமைதியா?

வழுவா? வழுவமைதியா?

வழுவென் றுரைப்பதா வழு
          வமைதி யுடுப்பதா தாவர
முயிரா யிருப்பதா யிருக்க
          சைவரென் றிருப்பரா சொல்க
பிணமேற் செடிமுளைப்பதும் அசைவ
          பிராணி யல்லவா ஆகும்
அதையுண் டிருப்பதும் ஊன்
          உண்ணி யல்லவா கூறும்
ஆசையற் றிருப்பரே விதியோ
         துறவென் றுரைப்பரே தவறோ
இறையாசை விடுத்தரே எவரோ
         இலயென் றுரைப்பரே உளரோ

                                    - சரவணபெருமாள்

        

தாய்

தாய்

பிறந்தவுடனே அழுதோம்
வாய் பேசியிருந்தால்
வலி என்ன என்று கேட்டு
அதையும் நிறுத்தியிருப்பாள்
தாய்

                               - சரவணபெருமாள்

தோற்றுப்போன வெங்காயம்

தோற்றுப்போன வெங்காயம்

கண்களை 
கலங்க வைப்பதில்
வெங்காயத்தொலி
உன்னிடம்
தோற்றுப்போனதடி

                            - Written By
                              சரவணபெருமாள்