கட்சி

கட்சி

எத்தனையோ கட்சியடா நாட்டுக்குள்ளே
         எத்தனெல்லாம் தலைவனடா கட்சிக்குள்ளே
நெல்லறுக்கப் போகிறவன் கோவணமே
          அதையும்விட கட்சிக்கொடி மிகநீளமே
கட்சிக்கெல்லாம் தலைமையகம் கோட்டைபோலே
         வாழுகிறார் இன்னும்பலர் வீதிமேலே

எத்தனையோ கழகங்களும் மாறிமாறி
         நாற்காலியைத் தேய்த்ததுவே ஏறிஏறி
கழகங்களில் கலகங்கள் நாறிநாறி
         மானங்கெட்டுப் போனதுவே கப்பலேறி
பிறந்தநாளைக் கொண்டாடும் ஊதாரி
         விவசாய இழப்பீட்டில் கஞ்சனாகி

உள்ளாட்சித் தேர்தலிலே விலகிநின்றார்
         சட்டமன்றத் தேர்தலிலே தழுவிக்கொண்டார்
அடுத்துவரும் தேர்தலிலே முட்டிக்கொள்வார்
         அடுத்தடுத்த தேர்தலிலே அணைத்துக்கொள்வார்
முன்தேர்தல் ஊழல்வாதி என்றுசொல்லி
         மறுதேர்தல் நண்பரென்று விருந்துகொள்வார்

ஏழையெல்லாம் உறுப்பினராம் பசிக்கட்சி
         ஏருழுது நெல்லறுத்தும் பசித்தகட்சி
ஆண்டதும் ஆள்வதும் பலகட்சி
         சாகாமல் வாழ்வது வறுமைக்கட்சி
கடன்சலுகை அறிவிப்பு தரும்கட்சி
         கடன்தந்து பங்கெடுத்துக் கொளும்கட்சி

தம்சாதி ஆதரவைப் பெறமுனைந்து
         ஏழைசாதி பசியாற்றும் பணிமறந்து
சாதிச்சாயம் பூசப்பட்டு சிலதலைவர்
         பெயர்சூட்டும் நாடகத்தில் கட்சித்தலைவர்
சாதியிலும் வீதியிலும் பலர்கட்சி
         துவங்கியதே சாதிவளர்ப்புப் பண்ணைக்கட்சி

சாதியிலே கட்சிபல துவக்கிக்கொண்டார்
         சாதிசொல்லித் தம்வயிறை நிரப்பிக்கொண்டார்
தமிழனென்று கட்சிசிலர் தொடங்கிக்கொண்டார்
         மொழிவடிவில் வேற்றுமையை வளர்த்தும்விட்டார்
தமிழ்த்தாயை விலைமாது போலாக்கும்
         கட்சிகளை கண்டறிந்து கழுத்தறுப்போம்

-  சரவணபெருமாள்